Appelsínukaka

kökur, uppskriftir
Himnesk alveg hreint..

Bökuðum þessa Appelsínuköku í dag. Langaði að gefa honum Hrafni mínum eitthvað gott í drekkutímanum og þá er þessi kaka einmitt svo upplögð því maður á eiginlega alltaf allt í hana! Pétur mætti svo heim úr vinnunni beint í volga kökusneið og var mjög ánægður með húsmóðurina haha 🙂

Þetta þarftu: 150gr sykur, 2 egg, 150gr smjörlíki, 150gr hveiti, 1 tsk lyfitduft, dálitla mjólk og nýkreistan appelsínusafa, flórsykur.

Svona gerirðu: Byrjaðu á því að þeyta saman sykurinn og egginn. Blandaðu svo bræddu smjörlíkinu, hveitinu og lyftiduftinu samanvið og hrærðu. Ef deigið er þykkt blandaðu þá smáveigis af mjólk við til að lina það upp eða appelsínusafa. Skelltu þessu svo í kökuform (svona kringlótt) og bakaðu við 200°C í í 30 mín. Á meðan kakan bakast þá skaltu hræra saman flórsykri og nýkreistum safa í glassúr. Þegar kakan er bökuð leyfirðu henni að kólna og tekur úr forminu. Svo er bara að glassúra!

Að lokum: Æðislega góð kaka sem mamma leyfði okkur systrum oft að baka þegar við vorum litlar. Mjög einfalt og fljótlegt að baka. Ef þið nennið ekki að kreista safa úr appelsínum er alveg hægt að nota safa úr fernu. Passa bara að hafa hann 100% og helst með aldinkjötinu. Ekta kaka til að baka þegar tilefnið er ekkert og þér langar bara í köku… HB

Hrafni Tjörva finnst appelsínukakan algjört gúmmelaði!!

Skriðinn úr hýði

almennt

Jæja gott fólk. Það er nú langt um liðið síðan ég hef hent inn færslu á Kúbbann en hann er einmitt kominn á nýjan stað sökum þess að það var einhver að skemma hann fyrir okkur. Við skelltum okkur með hann til Davíðs og Golíats og honum virðist líða vel þar.

Lífið hjá okkur gengur sinn vanagang, Hrafn er í sumarfríi og er heima með mömmu sinni og litlu systir og líkar það vel. Ég tek nánast ekkert sumarfrí, kannski 1 – 2 daga en fer í feðraorlof í september og verð út október. Það verður ljúft að fá að eyða tíma með “litlu” stelpunni minni.

Þann 22. ágúst verður stór stund í lífi Hrafns Tjörva og foreldranna því þá byrjar hann í Brákarborg. Við höfum verið duglega að labba framhjá leikskólanum og segja honum að þarna sé Brákarborg, leikskólinn hans. Svo fer hann að sjálfsögðu í aðlögun og verður spennandi að sjá hvernig hann tekst á við þetta. Svo bara krossum við putta og vonum að leikskólakennarar fari ekki í verkfall, sem er einmitt áætlað þann 22. ágúst.

Í gær var svo hin árlega pönnukökuferð á Þingvelli og fórum við ásamt Kollu & CO og Hrafnhildi & CO á Þingvelli og borðuðum pönnukökur í blíðskaparveðri og röltum svo um svæðið. Það var þreytt fjölskylda sem skilaði sér heim um 18:30

Já…svo er ég byrjaður í nýrri vinnu. Er kominn til Sensa og vinn þar sem Microsoft kall. Gæti ekki verið betra 🙂

Læt þetta heita gott í bili…

Skokkplanið mitt

hreyfing

Skokkplanið sem ég ætla að fara eftir til að byrja með er Þetta frábæra skokkplan sem heitir c25k.. semsagt from couch to 5 km eða úr þreyttri sófakartöflu í úber flottan skokkara sem getur hlaupið í 5 km án þess að stoppa. Þetta plan gengur út frá því að maður fari hægt og rólega af stað og ofgeri sér alls ekki til að byrja með og guggni og fari skælandi heim. Semsagt örugglega fínt fyrir mig. Tek það fram að ég íslenskaði þetta plan alveg sjálf! Ég geri mér fulla grein fyrir því að ég þarf svo að hlaupa 5 km lengra í ágúst.. það er seinni tíma vandamál og ég finn mér örugglega eitthvað flott plan til að tækla það síðar meir. Ég er búin að hlaupa V1-D1 og í dag ætla ég að hlaupa V1-D2..

Vika 1 – Dagur 1

hreyfing

Þá er hafin þjálfunin fyrir 10 km hlaupið í Reykjavíkurmaraþoninu í Ágúst. Við systkinin ætlum öll að hlaupa saman og styrkja krabbameinsfélagið. Þetta verður strembið fyrir mig að minnsta kosti þar sem ég hef ekki hreyft á mér rassinn síðan áður en börnin mín tvö komu í heiminn! Það eru semsagt um þrjú ár og tvö börn síðan 🙂

Þetta verður forvitnilegt.. tékkið á linkinum hérna fyrir neðan

via Endomondo Running Workout.